Angélica [una tragedia]

Angélica [una tragedia]
(España, 2016)

Dirección, guión e montaxe: Manuel Fernández-Valdés. Reparto: Angélica Liddell. Dur: 83'.

Unha muller, a súa voz, o seu corpo: berros, estalos e inflexións. Manuel Fernández-Valdés fai un retrato peculiar e intenso de Angélica Liddell, poeta, actriz e directora de teatro de vangarda, onde a ispe e á vez fórmaa ou escúlpea, durante o proceso creativo dunha próxima posta, que inclúe reminiscencias de China e do tiroteo en Utoia.

A ritmo de The House of the Rising Sun de The Animals, Liddell, nunha sorte de “spoken word”, propón o verbo como acto de ruptura, onde a fala adquire a dimensión do subversivo, para romper e crear. Baixo o influxo do diario fílmico é que Fernández-Valdés vai describindo as motivacións de Angélica, nunha transacción entre Eros e Tánatos, dende a dialéctica de violencia e poder, que a mantén viva e a desborda, como se a enerxía e vitalidade que mostra nas súas obras e poemas foran a suma do adiamento da súa propia e imaxinable traxedia.

(Mónica Delgado, OUFF)